{{فتاوى مُنْكَرَهْ}} شعر:عاطف ابو بكر/ابو فرحْ

{{فتاوى مُنْكَرَهْ}} شعر:عاطف ابو بكر/ابو فرحْ ----------------------------

١- صَعْبْ واللهِ الخِيارْ يا التشَبُّهْ بالكُفَّارْ زي ما قال الرُبِيعي يا التشبُّهْ بِهالحْمارْ ٢- جايِبِ هالفتاوي مْنينْ مِنً واشِنْطنْ وِلَّا الصينْ الِّي إسْمو الربيعي وٍعَمْ بِهَلْوِسْ باسْمِ الدينْ ٣- الِّي تْعَرَّى مْراتو طالِقْ هايْ مِنْ عِنْدَكْ يا مُنافُقْ الِّي عالمَنْطِقْ ما بِرْكَبْ أبداً ما بيجي مْنِ الخالِقْ ٤- ما سْمِعْناشِ مْنِ الرسولْ هالتخْبيصْ يا بهْلولْ وِانْتِ بْتِفْتي يِمًكِنْ إنَّكْ ماخِدْلَكْ حَبِّهْ وْمَسطولْ ٥- بعضِ شْيوخْنا مشغولينْ بالحِيضِ ْونَكًحِ الميْتَهْ أمَّا القُدْسُ وْفلسطينً ما بْتِسوى سيِخينْ الكُفْتَهْ ٦- واحدْ أفتى بالتحريمْ تِمْسِكْ بِمْراتَكْ بالسوقْ أقُسمْ باللهِ العظيمْ إنَّكْ يا بَعِيدِ بْهيمْ ٧- واحدْ أفتى بالرضاعهْ مْنِ الأنثى لَتْخاويهاً يعني صارِالدينْ شَمّاعَهْ الزِنا بِتْعلَّقْ عليها ٨- مِشْتَهي شْيوخِ القَطيعْ مَرَّهْ يِحْكوا عنِ التطْبيعْ وِيْقولوا لآلِ سْعودْ هذا مُنْكَرْ شو فَظيعْ ٩- التشبُّهً بالكفّارْ حرامْ وِالعَمالِهْ إلْهُمْ حَلال؟ طَيِّبْ لو كُنِتْ ضُرْغامْ شو رأيَكْ بِنَهْبِ المالْ؟ ١٠- مٍنينْ للأمَرا الأمْوالْ إنْتِ وْإنتِ يا دَجالْ سِرْقَهْ على روسِ الأشْهادْ أو وِرْثِهْ وِرْثوها حَلالْ؟ ١١- إنْتو فَتواكمْ عالجِنْسْ وٍعَ النِسوانُ وْعلى السكْسْ فتاوي لَتِلْهو الناسْ إفْتوا مرَّهْ عنِ القدْسْ ١٢- نْسيتوا إلْها أسرى وْشَطَحْتوا بالفتاوي وِنسيتوا عرَجِ مْنِ الأقصى وْإنْتو أصْلِ البلاوي ١٣- وْعنِ الأسرى ما سْمِعٍناشْ فتْوى معْ إنّْها بْبَلاشْ وِلَّا الِّي بِفتي خايفْ يِنْقِطِعْ عَنُّو المَعاشْ ١٤- إنْتو بوقِ السلاطينْ بْتِفْتوا مِثلِ الشياطينْ الدَمّْ بالبمَنْ حَلالْ يا وْلادِ المَلاعِينْ ١٥- إنْتو شَغْلِتْكو التزْويرْ وْللسلاطينِ التبْريرْ وْلَوي أعْناقِ الآياتْ وْتَحْليلْ طَعْريسِ الأميرْ ١٦- شَغْلتْكوا إلْهاءِ الناسْ عَنِ الوسْواسِ الخَنَّاسْ وْقَصاصِ الفقيرِ السارِقْ وْنسيانِ كْبيرينِ الراسْ ١٧- عْمِلْتوا الإسلامْ مَماسِحْ لَتَنْظيفْ عُهْرِ الحكَّامْ وأللهْ إلْكمْ لا يْسامِحْ ما دُمْتو إلْهُمْ خُدَّامْ ١٨- فَتاوي تِحِتْ لِحْزامْ وْخُذْ حلالُ وًخُذً حرامً وْأبداً ما فتوى سْمِعْنا عِنَّا عنْ عُهْرِ الحكّامْ ١٩- شوفو أدْوارِ الحاخاماتْ عِنْدِ العدوّْ شو كٍبيرِهْ وِانْتو يا صْحابِ باللَفَّاتْ شُو حَقيرِهْ وِزْغيرِهْ ٢٠- زَمانْ دُورِ العالِمْ كانْ أكبرْ مِنْ دورِ الأميرْ وْإنتو كلِّ الشُغُلِ الآنً للحاكِمْ بِيِعِ الضميرْ ٢١- كانِ العِزِّ بِنِ السلامْ بالسوقِ يْبيعِ القُوَّادْ لَيْنَفِّذْ حُكْمِ الإسلامْ وِاليومْ للحاكِمْ قَوَّادْ ٢٢- إلِّي ما بِآمِنْ فيكْ سَيِّدْنا بأللهْ كافِرْ قالِ الشيخْ للمَليكْ تْفو عَ هَالمَساخِرْ ٢٣- وْكانْ هالشيخِ الصعلوكْ عارِفْ شو سِيدو عاهِرْ وِاسْمَعِ بْذانَكْ يا بِيِكْ كِيفْ بْدينو بِتاجِرْ ٢٤- الداعي للإسلامِ اليومْ بِدُّو صالِهٍ خَمْسِ نْجومْ وْبِدُّو سيَّارةْ مرْسيدِسْ وْمعاها طبْعاً المعلومْ ٢٥- وِالداعي أيَّامْ زَمانْ كانِ يْقاتِل بالمِيدانْ وْدَوْماً بِرأسِ الهجومْ مَعُهْ سِيفو وِالقرآنْ ٢٦- وْكانْ لو اخْطا السلطانْ يِشْهِرْ بِوِجْهو القرآنْ وْكانْ يِمْكِنِ بِقودو وْأحْسنْ مِنُّو بالمِيدانْ ٢٧- تَعْ شوفو دُعاةِ اليومٍْ كْثيرْ مِنْهمْ مِثلِ البومْ معِ الحاكِمْ مهما صارْ حتّى لو شافو مأثومْ ٢٨- عنَّا اليومْ أراجوزاتْ كُلُّو دايِرْ عَ الليراتْ بِدْهُمْ مَصاري الحكّامْ وْبِعْطوهُمِ تَبْريكاتْ ٢٩- طَلَّعْ لِيزا الإنْجليزْ مِنْ سُلالِةْ الرسولْ علي جمْعهْ الأراجوزْ لا تْقولولي مشْ معقولْ ٣٠- خُذِ القُولِ مْنِ الآخِرْ بِدْهُمْ هِيكْ مَساخِرْ لا بِهِشُّو وَلا بِنِشُّو والفتوى سِيدي حاضِرْ ٣١- بِيجيلو الجمْعهْ خِطاباتْ معْ أمْرِ المخابراتْ وْما بِقْدَرْ عالنَصِّ يْزِيدْ واللهِ أرْبَعْ كِلْماتْ ٣٢- وْلوْ كتبوا آيِهْ مَغلوطَهْ بِقْراها مِثلْ ما هِيِّهْ بِقْراها مشْ مَزْبوطَهْ وْبِدَّعِي حُسْنِ النِيِّهْ ٣٣- كْثيرْ عنَّا بْفلسطينْ بِخْشوا الدُعا للمَساجينْ وْببلادِ العربْ كمانْ بالأمِرْ مشْ مَعْنِيِّينْ ٣٤- يا وِيلِ الأمِّهْ يا ويلْ إحْنا بْزَمَنِ غثاءِ السيلْ وْلَمّا عَطَّلنا الجهادْ صِرْنا بِينِ الأمَمِ الذِيلْ -------------------------- شعر:عاطف ابو بكر/ابو فرح ٢٠١٧/٥/١٩م كتبتها الان عندما سمعت فتوى من مشايخ الطبيخ للشيخ علي الربيعي يقول بها انّ التعري بين الزوجين يجعل الزوجة طالقة شرعاً لانّ ذلك تشبّه بالكفّار،،شايفين ليش احنا بذيل الأمم ويحكمنا لمم بجم وللأعادي خدم..